07:23 am 17/5/2017
കൊച്ചി: ചരിത്രകാരനും കേരള ടൈംസ് മാനേജിംഗ് എഡിറ്ററുമായിരുന്ന മോണ്‍. ജോര്‍ജ് വെളിപ്പറമ്പില്‍ (86) നിര്യാതനായി. വരാപ്പുഴ അതിരൂപതാംഗമാണ്. സംസ്കാരം ചൊവ്വാഴ്ച ഉച്ചകഴിഞ്ഞു 3.30ന് ചേരാനല്ലൂര്‍ നിത്യസഹായമാതാ പള്ളിയില്‍.
ഗണിതശാസ്ത്രത്തിലും ദൈവശാസ്ത്രത്തിലും ബിരുദവും ന്യൂസ് പേപ്പര്‍ മാനേജ്‌മെന്‍റില്‍ ബിരുദാനന്തരബിരുദവും നേടിയിട്ടുള്ള മോണ്‍. വെളിപ്പറമ്പില്‍ 1962 മുതല്‍ 1992 വരെ കേരള ടൈംസില്‍ സേവനം ചെയ്തു. 27 വര്‍ഷം മാനേജിംഗ് എഡിറ്ററായിരുന്നു. ഐസിപിഎ പ്രസിഡന്‍റ്, സൗത്ത് ഏഷ്യന്‍ പ്രസ് അസോസിയേഷന്‍ മേഖല പ്രസിഡന്‍റ്, സംസ്ഥാന സര്‍ക്കാരിന്‍റെ വിവിധ പ്രസ് കമ്മിറ്റികളിലും കേരള പ്രസ് അക്കാദമിയുടെ പ്രഥമ അക്കാദമി കൗണ്‍സിലിലും അംഗം, അക്കാദമിയിലെ വൈദികനായ ആദ്യത്തെ വിസിറ്റിംഗ് പ്രഫസര്‍ എന്നീ നിലകളിലും സേവനം ചെയ്തു.
ചേരാനല്ലൂര്‍ വെളിപ്പറമ്പില്‍ പേറു മേസ്ത്‌രിയുടെയും മേരിയുടെയും മകനായി 1930 ഒക്‌ടോബര്‍ 19നാണു ജനനം. 1946ല്‍ സെമിനാരിയില്‍ ചേര്‍ന്നു. 1961 മാര്‍ച്ച് 17നു പൗരോഹിത്യം സ്വീകരിച്ചു. എറണാകുളം സെന്‍റ് ഫ്രാന്‍സിസ് അസീസി കത്തീഡ്രല്‍, പുല്ലേപ്പടി, പെരുമാനൂര്‍, വെണ്ടുരുത്തി, ഓച്ചന്തുരുത്ത് പള്ളികളില്‍ വികാരിയായിരുന്നു.
ഐഎസ് പ്രസ് മാനേജര്‍, വൊക്കേഷന്‍ വിഭാഗം ഡയറക്ടര്‍, അതിരൂപത മതബോധന ഡയറക്ടര്‍, പൊന്തിഫിക്കല്‍ മിഷന്‍ ഓര്‍ഗനൈസേഷന്‍ ഡയറക്ടര്‍, വേളാങ്കണ്ണി തീര്‍ഥാടന കേന്ദത്തില്‍ മലയാളികള്‍ക്കുവേണ്ടിയുള്ള ചാപ്ലയിന്‍ എന്നീ നിലകളിലും പ്രവര്‍ത്തിച്ചു. 2009 സെപ്റ്റംബര്‍ 13ന് ആര്‍ച്ച്ബിഷപ് ഡോ. ഡാനിയേല്‍ അച്ചാരുപറമ്പിലില്‍നിന്നു മോണ്‍സിഞ്ഞോര്‍ പദവി സ്വീകരിച്ചു.
കേരള പത്രചരിത്രം, ക്രിസ്ത്യന്‍ ഹെറിറ്റേജ് ഓഫ് കേരള, വരാപ്പുഴ അതിരൂപത ശതാബ്ദി സ്മരണിക, സത്യനാദ ചരിത്രം, ആദര്‍ശചിന്തകള്‍, കേരളസഭാചരിത്രം എന്നീ ഗ്രന്ഥങ്ങള്‍ രചിച്ചിട്ടുണ്ട്.