08:02 am 15/1/2017
കോട്ടയം: ചങ്ങനാശേരി അതിരൂപത സഹായ മെത്രാനായി ചങ്ങനാശേരി സെന്റ് മേരീസ് മെത്രാപ്പോലീത്തന്‍ ഇടവകാംഗമായ റവ. ഡോ.തോമസ് (ടോമിച്ചന്‍) തറയിലി (44)നെ സീറോ മലബാര്‍ സഭാ സിനഡ് തെരഞ്ഞെടുത്തു. ശനിയാഴ്ച വൈകുന്നേരം 4.30ന് സഭാ ആസ്ഥാനമായ കാക്കനാട് മൗണ്ട് സെന്റ് തോമസില്‍ മേജര്‍ ആര്‍ച്ച് ബിഷപ് കര്‍ദിനാള്‍ മാര്‍ ജോര്‍ജ് ആലഞ്ചേരിയാണ് പ്രഖ്യാപനം നടത്തിയത്. മാര്‍ ജോര്‍ജ് ആലഞ്ചേരിയും ചങ്ങനാശേരി ആര്‍ച്ച് ബിഷപ് മാര്‍ ജോസഫ് പെരുന്തോട്ടവും നിയുക്ത മെത്രാനെ സ്ഥാനചിഹ്നങ്ങള്‍ അണിയിച്ചു.
ചങ്ങനാശേരി അതിരൂപതയുടെ കീഴില്‍ ആലപ്പുഴ പുന്നപ്രയിലുള്ള ധ്യാന, കൗണ്‍സിലിംഗ് കേന്ദ്രമായ ദനഹാലയയുടെ ഡയറക്ടറാണ് റവ.ഡോ. ടോമി തറയില്‍. ചങ്ങനാശേരി തറയില്‍ പരേതനായ ജോസഫ് (കുഞ്ഞ് സാര്‍, ചേപ്പാട് െ്രെകസ്റ്റ് കിംഗ് എച്ച്എസ് മുന്‍ അധ്യാപകന്‍) മറിയാമ്മ ദമ്പതികളുടെ ഏഴു മക്കളില്‍ ഇളയയാളാണ്. റവ.ഡോ. ടോമി തറയില്‍ 2000 ജനുവരി ഒന്നിന് മാര്‍ ജോസഫ് പൗവത്തിലില്‍നിന്നാണ് പൗരോഹിത്യം സ്വീകരിച്ചത്. റോമിലായിരുന്നു ഉപരിപഠനം. വചനപ്രഘോഷകനും ധ്യാനഗുരുമാണ് അദ്ദേഹം.
1989–ല്‍ വൈദിക പരിശീലനത്തിനായി കുറിച്ചി മൈനര്‍ സെമിനാരിയില്‍ ചേര്‍ന്നു. വടവാതൂര്‍ സെന്റ് തോമസ് അപ്പസ്‌തോലിക് സെമിനാരിയില്‍ തത്വശാസ്ത്ര പഠനവും ദൈവശാസ്ത്രപഠനവും നടത്തിയ നിയുക്ത മെത്രാന്‍ റോമിലെ ഗ്രിഗോറിയന്‍ യൂണിവേഴ്‌സിറ്റിയില്‍നിന്നു മനശാസ്ത്രത്തില്‍ ലൈസന്‍ഷ്യേറ്റും ഡോക്ടറേറ്റും നേടി. പുതിയ മെത്രാന്റെ നിയമനത്തോടെ സീറോ മലബാര്‍ സഭയിലെ മെത്രാന്മാരുടെ എണ്ണം 59 ആയി.