12-04-2016
മുന്‍ അഡീഷണല്‍ ചീഫ് സെക്രട്ടറി സഖറിയ മാത്യു (82) അന്തരിച്ചു. ഹൃദയാഘാതത്തെ തുടര്‍ന്ന് തിങ്കളാഴ്ച രാവിലെ കവടിയാറിലെ വസതിയിലായിരുന്നു അന്ത്യം. സംസ്‌കാരം ചൊവ്വാഴ്ച ഉച്ചകഴിഞ്ഞ് 3.30ന് സെന്റ് ജോര്‍ജ് ഓര്‍ത്തഡോക്‌സ് പള്ളിയുടെ പാറ്റൂരിലെ സെമിത്തേരിയില്‍ നടക്കും.
1957 ബാച്ച് ഐഎഎസ് ഉദ്യോഗസ്ഥനായ സഖറിയ മാത്യു സംസ്ഥാന സിവില്‍ സര്‍വീസിലെ പ്രഗത്ഭനായ ഉദ്യോഗസ്ഥനായിരുന്നു. തൃശൂര്‍ സബ്കളക്ടറായി ഔദ്യോഗിക ജീവിതം ആരംഭിച്ച അദ്ദേഹം കോഴിക്കോട് കളക്ടര്‍, ആരോഗ്യം, വിദ്യാഭ്യാസം, പൊതുഭരണം, ടൂറിസം വകുപ്പുകളുടെ സെക്രട്ടറി എന്നീ നിലകളില്‍ പ്രവര്‍ത്തിച്ചിട്ടുണ്ട്. റവന്യു ബോര്‍ഡില്‍ ലാന്‍ഡ് റവന്യു, എക്‌സൈസ്, സിവില്‍ സപ്ലൈസ് എന്നീ വകുപ്പുകളുടെ ചുമതല വഹിച്ചു. സംസ്ഥാനത്ത് മാവേലി സ്റ്റോറുകള്‍ പ്രവര്‍ത്തനമാരംഭിച്ചത് ഇദ്ദേഹത്തിന്റെ ഭരണകാലത്താണ്.
ചീഫ് സെക്രട്ടറി ഗ്രേഡില്‍ അഡീഷണല്‍ ചീഫ് സെക്രട്ടറിയായി പ്രവര്‍ത്തിച്ച ഇദ്ദേഹം അഴിമതി നിരോധന കമ്മീഷന്‍ അംഗമായും പ്രവര്‍ത്തിച്ചിട്ടുണ്ട്. സംസ്ഥാന സ്‌പോര്‍ട്‌സ് കൗണ്‍സില്‍ പ്രസിഡന്റായും സേവനമനുഷ്ടിച്ചു.