08:14 pm 2/4/2017
ലണ്ടന്‍ : ബ്രിട്ടന്‍റെ ചരിത്രത്തില്‍ ആദ്യമായി റിസര്‍ച്ച് കള്‍ച്ചറിനെപ്പറ്റി പ്രബന്ധം അവതരിപ്പിക്കുകയും ഡോക്ടറേറ്റ് നേടി മലയാളി സമൂഹത്തിന് അഭിമാനമായ കോട്ടയംകാരി മഞ്ജു ലക്‌സണ്‍ ഗ്രേറ്റര്‍ മാഞ്ചസ്റ്റര്‍ ക്ലിനിക്കല്‍ റിസര്‍ച്ച് നെറ്റ് വര്‍ക്കില്‍ (സിആര്‍എന്‍) അസിസ്റ്റന്‍റ് റിസര്‍ച്ച് ഡെലിവറി മാനേജരായി നിയമിതയായി. ജൂണ്‍ 28ന് പുതിയ സ്ഥാനം ഏറ്റെടുക്കും.
നാഷണല്‍ ഇന്‍സ്റ്റിറ്റിയൂട്ട് ഓഫ് ഹെല്‍ത്ത് റിസര്‍ച്ചിന്‍റെ മാഞ്ചസ്റ്റര്‍ ക്ലിനിക്കല്‍ റിസര്‍ച്ച് ഫെസിലിറ്റിയില്‍ ക്വാളിറ്റി ലീഡ് (Clinical Lead) ആയി ജോലി ചെയ്തുവരവെയാണ് റിസര്‍ച്ച് വിഭാഗത്തിന്‍റെ ഇക്വാവാളിറ്റി ആന്‍ഡ് ഡൈവേഴ്‌സിറ്റി കോഓര്‍ഡിനേറ്റര്‍ കൂടിയാണ് മഞ്ജുവിന്‍റെ പുതിയ നിയമനം.
ഡല്‍ഹിയിലെ ഓള്‍ ഇന്ത്യ ഇന്‍സ്റ്റിറ്റിയൂട്ട് ഓഫ് മെഡിക്കല്‍ സയന്‍സില്‍ എന്‍ട്രന്‍സ് പരീക്ഷയില്‍ റാങ്കോടെ നഴ്‌സിംഗ് പഠനത്തിന് തുടക്കം കുറിച്ച മഞ്ജു, മൂന്നാം റാങ്കോടെയാണ് ബിഎസ് സി (ഹോണേഴ്‌സ്, 1996/2000) പഠനം പൂര്‍ത്തിയാക്കിയത്. തുടര്‍ന്ന് 2001 ല്‍ യുകെയിലെത്തി മാഞ്ചസ്റ്റര്‍ യൂണിവേഴ്‌സിറ്റിയില്‍ നിന്ന് 2002 ല്‍ അഡ്വാന്‍സ്ഡ് നഴ്‌സിംഗ് സ്റ്റഡീസില്‍ എംഎസ് സി ബിരുദം നേടി. ഈ കാലയളവില്‍ ജര്‍മനി, ഓസ്ട്രിയ, സ്വിറ്റ്‌സര്‍ലന്‍ഡ് തുടങ്ങിയ രാജ്യങ്ങളില്‍ നടത്തിയ ഗവേഷണങ്ങളിലും നിരവധി ഇന്‍റര്‍നാഷണല്‍ കോണ്‍ഫറന്‍സുകളിലും റിസര്‍ച്ച് പ്രോജക്ടുകളിലും മഞ്ജു പങ്കാളിയായി മികച്ച സ്‌കോര്‍ നേടിയിരുന്നു. സെന്‍ട്രല്‍ മാഞ്ചസ്റ്റര്‍ യൂണിവേഴ്‌സിറ്റി എന്‍ എച്ച്എസ് ട്രസ്റ്റില്‍ ട്രാഫോര്‍ഡ് ആശുപത്രികളുടെയും അക്യുട്ട് മെഡിസിന്‍ കമ്യൂണിറ്റി മെഡിസിന്‍ വിഭാഗങ്ങളുടെയും ഡിവിഷണല്‍ റിസര്‍ച്ച് മാനേജരായും പ്രവര്‍ത്തിച്ച മഞ്ജു ഇപ്പോള്‍ മാഞ്ചസ്റ്റര്‍ മെട്രോപ്പോളീറ്റന്‍ യൂണിവേഴ്‌സിറ്റിയില്‍ ഹോണററി സ്റ്റാഫാണ്.
യുകെയിലെ ഹൈപ്പര്‍ടെന്‍ഷന്‍ സ്‌പെഷലിസ്റ്റ് നഴ്‌സുമാരുടെ ദേശിയ സംഘടനയായ നഴ്‌സസ് ഹൈപ്പര്‍ടെന്‍ഷന്‍ അസോസിയേഷന്‍ ഓഫ് യുകെയില്‍ രണ്ടുവര്‍ഷം ജോയിന്‍റ് സെക്രട്ടറിയും തുടര്‍ന്ന് ഈ അസോസിയേഷന്‍റെയും സൊസൈറ്റിയുടെയും നിരവധി കോണ്‍ഫറന്‍സുകളില്‍ അധ്യക്ഷയുമായിരുന്നു. ഇന്‍റര്‍നാഷണല്‍ ജേര്‍ണലുകളിലെ ക്ഷണിതാവ് എന്ന നിലയില്‍ നിരവധി ലേഖനങ്ങള്‍ തയാറാക്കിയിട്ടുണ്ട്. ലിവര്‍പൂള്‍ യൂണിവേഴ്‌സിറ്റിയിലെ ഒബ്‌സര്‍വേഷണല്‍ ക്ലിനിക്കല്‍ സ്കില്‍ഡ് എക്‌സാമിനറായും സേവനം അനുഷ്ഠിച്ചിട്ടുണ്ട്. സെന്‍ട്രല്‍ മാഞ്ചസ്റ്റര്‍ യൂണിവേഴ്‌സിറ്റി ഹോസ്പിറ്റല്‍സ് എന്‍എച്ച്എസ് ഫൗണ്ടേഷനില്‍ റിസര്‍ച്ച് ആന്‍ഡ് ഇന്നവേഷന്‍ ഡിവിഷനിലായിരുന്നു മഞ്ജുവിന്‍റെ തുടക്കം.
മാഞ്ചസ്റ്റര്‍ മേട്രോപോളിറ്റന്‍ യുണിവേഴ്‌സിറ്റിയില്‍ നിന്നും പ്രഫ. കാരോള്‍ ഹേ യുടെയും ഡോ. ഫിയോന ഡങ്കന്‍റെയും മേല്‍നോട്ടത്തിലാണ് മഞ്ജു ഡോക്ടര്‍ ഓഫ് ഫിലോസഫി കരസ്ഥമാക്കിയത്. നഴ്‌സിംഗ് മേഖലയുമായി ബന്ധപ്പെട്ട് ക്ലിനിക്കല്‍ റിസര്‍ച്ചില്‍ മഞ്ജു ലക്‌സണ്‍ മുന്പും നേട്ടം കൈവരിച്ചിരുന്നു.
കഴിഞ്ഞവര്‍ഷം ദി അഡ്വര്‍ടൈസര്‍ എന്ന മാഞ്ചസ്റ്ററിലെ പ്രമുഖ ദിന പത്രത്തില്‍ മഞ്ജുവിന്‍റെ അഭിമുഖം പ്രസിദ്ധീകരിച്ചിരുന്നു. റിസര്‍ച്ച് കള്‍ച്ചറിനെ ആസ്പദമാക്കിയുള്ള മഞ്ജുവിന്‍റെ ഗവേഷണത്തിന് നഴ്‌സിംഗ് റിസര്‍ച്ച് സൊസൈറ്റി ഓഫ് ഇന്ത്യയുടെ (NRSI) മംഗലാപുരം ഫാദര്‍ മുല്ലെര്‍സില്‍ നടത്തിയ അന്താരാഷ്ട്ര സമ്മേളനത്തില്‍ ഒന്നാം സ്ഥാനം ലഭിച്ചിട്ടുണ്ട്.
കലാരംഗത്തും സജീവമായ മഞ്ജു യുക്മ നടത്തിയ കലോല്‍സവത്തില്‍ കലാതിലകമായി തെരഞ്ഞെടുക്കപ്പെട്ടിട്ടുണ്ട്. സംഘടനകളിലും മാഞ്ചസ്റ്റര്‍ കാത്തലിക് അസോസിയേഷന്‍ ഉള്‍പ്പെടെയുള്ള മലയാളി കൂട്ടായ്മകളില്‍ സജീവ പ്രവര്‍ത്തകയുമാണ്.
കെഎസ് ഇബി മുന്‍ എന്‍ജിനിയറും യുകെയിലെ ഒഐസിസി നേതാവുമായ ചങ്ങനാശേരി തുരുത്തി സ്വദേശി ഡോ. ലക്‌സണ്‍ ഫ്രാന്‍സിസ് കല്ലുമാടിക്കലിന്‍റെ ഭാര്യയും കൊഴുവനാല്‍ മഞ്ഞാമറ്റം പള്ളത്ത് ചാക്കോച്ചന്‍ ആനിയമ്മ ദന്പതികളുടെ മകളാണ് മഞ്ജു. ലിവിയ, എല്‍വിയ, എല്ലിസ് എന്നിവര്‍ മക്കളാണ്.
റിപ്പോര്‍ട്ട്: ജോസ് കുമ്പിളുവേലില്‍