09:10am 07/04/2016
ന്യൂഡല്‍ഹി: ആഗോള തലത്തില്‍ വന്‍ കോളിളക്കം സൃഷ്ടിച്ച പാനമ പേപ്പര്‍ വെളിപ്പെടുത്തലില്‍ ഒരു മലയാളി കൂടി. പത്തനംതിട്ട ജില്ലയിലെ റാന്നി സ്വദേശിയായ ദിനേശ് പരമേശ്വരന്‍ നായരുടെ പേരു വിവരങ്ങളാണ് ഇന്ത്യന്‍ എക്‌സ്പ്രസ് ‘പാനമ പേപേഴ്‌സ്4’ല്‍ ഉള്ളത്.
ബ്രിട്ടീഷ് വിര്‍ജിന്‍ ദ്വീപുകളില്‍ രജിസ്റ്റര്‍ ചെയ്യപ്പെട്ട കമ്പനിയിലാണ് ദിനേശ് പരമേശ്വരന്‍ കള്ളപ്പണ നിക്ഷേപം നടത്തിയത്. 2007 ആഗസ്റ്റ് 17 മുതല്‍ ഗെല്‍ഡിന്‍ ട്രേഡിങ് കമ്പനിയുടെ ഡയറക്ടറാണ് ദിനേശ് എന്ന് മൊസാക് ഫൊണ്‍സേക രേഖകള്‍ വ്യക്തമാക്കുന്നു. ചൈനീസ് പൗരനുമായി ചേര്‍ന്ന് 25000 ഓഹരികളാണ് ഇയാളുടെ പേരിലുള്ളത്.
ചെറുകിട കൊപ്ര വ്യാപാരിയുടെ മകനായ ദിനേശ് ബിരുദ പഠനത്തിന് ശേഷം മുംബൈയിലെ നിരവധി കമ്പനികളില്‍ ജോലി ചെയ്തിരുന്നു. 2008ലാണ് ഇയാള്‍ ഹോങ്കോങ്ങിലേക്ക് പോയത്. റാന്നിയില്‍ രണ്ട് കുട്ടികളോടൊപ്പം ചെറിയ വീട്ടില്‍ താമസിക്കുന്ന ദിനേശിന്റെ ഭാര്യ ജയശ്രീ വാര്‍ത്തയോട് പ്രതികരിക്കാന്‍ തയാറായില്ല. ദിനേശിന് ഹോങ്കോങ്ങില്‍ എന്ത് ജോലിയാണെന്ന് അറിയില്ലെന്നും സ്വദേശത്ത് വലിയ വീട് നിര്‍മിക്കുന്നുണ്ടെന്നുമാണ് പ്രദേശവാസികള്‍ മാധ്യമങ്ങളോട് പറഞ്ഞത്.
തിരുവനന്തപുരം സ്വദേശിയായ ജോര്‍ജ് മാത്യുവിന് വിദേശത്ത് രഹസ്യ നിക്ഷേപമുള്ളതിന്റെ വിവരങ്ങള്‍ ബുധനാഴ്ച ഇന്ത്യന്‍ എക്‌സ്പ്രസ് പുറത്തുവിട്ട ‘പാനമ പേപേഴ്‌സ്3’ല്‍ വെളിപ്പെടുത്തിയിരുന്നു. സിംഗപ്പൂരില്‍ താമസിക്കുന്ന ജോര്‍ജ് ഫ്യൂച്ചര്‍ ബുക്‌സ് എന്ന പേരിലുള്ള കമ്പനിയിലാണ് പണം നിക്ഷേപിച്ചത്. പുതിയ കമ്പനികള്‍ രൂപവത്കരിക്കാന്‍ സഹായം നല്‍കുന്ന സ്ഥാപനം സിംഗപ്പൂരില്‍ നടത്തുകയാണ് ജോര്‍ജ് മാത്യു.
ദിനേശ് പരമേശ്വരനെ കൂടാതെ ഡല്‍ഹി ബിസിനസുകാരന്‍ വിനയ് കൃഷ്ണന്‍ ചൗധരിയുടെ ഉടമസ്ഥതയിലുള്ള ട്രിംബ്ലേഷ് ‘എന്‍’ സാവാസ്, ചെന്നൈ ചൂളമൂട് സ്വദേശി ചിന്നമരുതു ഷണ്‍മുഖ സുന്ദരപാണ്ഡ്യന്‍, ന്യൂഡല്‍ഹി സ്വദേശി ഉദയ് പ്രതാപ് സിങ് എന്നിവര്‍ക്കും കള്ളപ്പണ നിക്ഷേപമുള്ളതായി രേഖകള്‍ പറയുന്നു.
ലണ്ടനില്‍ താമസിക്കുന്ന സില്‍വിയ ഫേ ഭാട്ടിയ, ഭര്‍ത്താവ് അലോക് ഭാട്ടിയ, മുംബൈ സ്വദേശികളായ നിഷ് ഭുട്ടാനി, ജോണി മംഗ്ലാനി, മുംബൈ ആസ്ഥാനമായ ജയന്തിലാല്‍ താക്കര്‍ എന്ന സ്ഥാപനത്തിന്റെ പങ്കാളിയായ ദിലിപ് ജെ. താക്കര്‍, കൊല്‍ക്കത്ത സ്വദേശികളായ സുശീല ദേവി ചോപ്ര, ഗൗരവ് കുമാര്‍ ചോപ്ര, പ്രേരണ ചോപ്ര എന്നിവരും വ്യാജ കമ്പനികളുടെ പേരില്‍ കള്ളപ്പണം നിക്ഷേപിച്ചിട്ടുണ്ടെന്ന് ‘പാനമ പേപേഴ്‌സ്4’ല്‍ വെളിപ്പെടുത്തുന്നു.