10:08 am 8/2/2017
കോൽക്കത്ത: ബംഗാളി സിനിമ, സീരിയൽ താരം ബിതസ്ത സാഹയെ(28) തെക്കൻ കോൽക്കത്തയിലെ ഫ്ലാറ്റിൽ തൂങ്ങി മരിച്ച നിലയിൽ കണ്ടെത്തി. ചൊവ്വാഴ്ച രാത്രിയിൽ ബന്ധുക്കളാണ് മൃതദേഹം കണ്ടെത്തിയത്. ബന്ധുക്കൾ പോയി വിളിച്ചിട്ടും വാതിൽ തുറക്കാതായതോടെ പൂട്ട് പൊളിച്ച് അകത്തു കയറുകയായിരുന്നു. കൈ ഞരന്പുകൾ മുറിഞ്ഞു രക്തം വാർന്നൊലിച്ച നിലയിലായിരുന്നു മൃതദേഹം.
കഴിഞ്ഞ ചിലനാളുകളായി ഫ്ളാറ്റിൽ തനിയെ താമസിക്കുകയായിരുന്നു സാഹ. ബന്ധുക്കൾ പലതവണ വിളിച്ചിട്ടും ഫോണും എടുത്തിരുന്നില്ല. ഇതേത്തുടർന്ന് ഫ്ളാറ്റിൽ അന്വേഷിച്ച് എത്തിയപ്പോഴാണ് മൃതദേഹം കണ്ടെത്തിയത്.
ഗാർഫ പോലീസ് എത്തി നടപടികൾ സ്വീകരിച്ചു. നടി ജീവനൊടുക്കിയത് ആകാമെന്ന നിഗമനത്തിലാണ് പോലീസ്. മൃതദേഹം പോസ്റ്റ്മോർട്ടം ചെയ്യാൻ അയച്ചു.