01:22 pm 1/1/2017
ചെന്നൈ: പാരാലിമ്പിക്‌സില്‍ സ്വര്‍ണം നേടിയ തമിഴ്‌നാട്ടുകാരന്‍ തങ്കവേലു മാരിയപ്പെൻറ ജീവിതം സിനിമയാകുന്നു. ഐശ്വര്യ ധനുഷ് രജനീകാന്താണ് ‘മാരിയപ്പന്‍’ എന്ന പേരിൽ സിനിമ സംവിധാനം ചെയ്യുന്നത്.
പുതുവത്സരത്തില്‍ ബോളിവുഡ് താരം ഷാരൂഖ് ഖാന്‍ തന്റെ ട്വിറ്റര്‍ അക്കൗണ്ടിലൂടെയാണ് ചിത്രത്തിന്റെ ഫസ്റ്റ് ലുക്ക് പോസ്റ്റര്‍ പുറത്തിറക്കിയത്.
ഇന്ത്യയുടെ ജെഴ്‌സിയണിഞ്ഞ് കൈയില്‍ സ്വര്‍ണ മെഡലുമായി പുറം തിരിഞ്ഞു നില്‍ക്കുന്ന മാരിയപ്പന്റെ ചിത്രമാണ് പോസ്റ്ററിലുള്ളത്. ഏതു താരമാണ് മാരിയപ്പന്റെ കഥാപാത്രത്തെ അവതരിപ്പിക്കുകയെന്ന് വ്യക്തമാക്കിയിട്ടില്ല.
സീന്‍ റോള്‍ഡനാണ് ചിത്രത്തിന് സംഗീതം നല്‍കുന്നത്. വേല്‍രാജ് ഛായാഗ്രഹണം നിര്‍വഹിക്കുന്ന ചിത്രത്തിന് സംഭാഷണമൊരുക്കുന്നത് രാജു മുരുകനാണ്.
തമിഴ്‌നാട്ടിലെ സേലത്ത് നിന്നുള്ള ഇരുപത്തിയൊന്നുകാരനായ മാരിയപ്പന്‍ ഹൈജമ്പ് ടി-42 വിഭാഗത്തിലാണ് റിയോ പാരാലിമ്പിക്‌സില്‍ സ്വര്‍ണം നേടിയത്. ജീവിതത്തില്‍ പ്രതിസന്ധികളെ തോല്‍പ്പിച്ചായിരുന്നു മാരിയപ്പെൻറ നേട്ടം.