09:50 am 21/8/2016
കോട്ടയം: റബര് മേഖലയിലെ പ്രശ്നങ്ങളെക്കുറിച്ച് ചര്ച്ചചെയ്യുവാനെന്ന പേരില് കേന്ദ്രവാണിജ്യ മന്ത്രാലയം നാളെ (ഓഗസ്റ്റ് 22 തിങ്കളാഴ്ച) ഡല്ഹിയില് വിളിച്ചുചേര്ത്തിരിക്കുന്ന യോഗം പ്രഹസനമാണെന്നും വരാന്പോകുന്ന സംയോജിത സാമ്പത്തിക പങ്കാളിത്ത ഉടമ്പടി (ആര്.സി.ഇ.പി.)ഉള്പ്പെടെ രാജ്യാന്തര കരാറുകളിലൂടെ റബറിന്റെ നികുതിരഹിത ഇറക്കുമതിക്ക് റബര്മേഖലയിലുള്ളവരുമായി ചര്ച്ചനടത്തി അഭിപ്രായസമന്വയമുണ്ടാക്കിയെന്ന് വരുത്തിത്തീര്ക്കുവാനുള്ള രഹസ്യഅജണ്ടയാണ് യോഗമെന്ന് സംശയിക്കുന്നുവെന്നും ഇന്ഫാം ദേശീയ സെക്രട്ടറി ജനറല് ഷെവലിയര് അഡ്വ.വി.സി.സെബാസ്റ്റ്യന് പറഞ്ഞു.
റബര്കൃഷിയുള്ള സംസ്ഥാനങ്ങളിലെ പാര്ലമെന്റംഗങ്ങള്, റബര്മേഖലയിലെ വിവിധ സംഘടനാ പ്രതിനിധികള്, റബര്ബോര്ഡ് ഉദ്യോഗസ്ഥര് എന്നിവരെയാണ് സമ്മേളനത്തിന് ക്ഷണിച്ചിരിക്കുന്നത്. നാളെ (ഓഗസ്റ്റ് 22ന്) ഉച്ചകഴിഞ്ഞ് 4.30 മുതല് 5.30 വരെയാണ് യോഗം ചേരുന്നത്. റബര് പ്രശ്നങ്ങള് ചര്ച്ചചെയ്യുന്ന യോഗത്തിന്റെ അറിയിപ്പ് റബര് ബോര്ഡ് തയ്യാറാക്കിയത് ഓഗസ്റ്റ് 17ന്. തുടര്ന്നുള്ള ദിവസങ്ങളിലാണ് പലര്ക്കും അറിയിപ്പ് കിട്ടിയത്. ജനപ്രതിനിധികളും ഉദ്യോഗസ്ഥരും സര്ക്കാര് ചെലവില് യോഗത്തില് പങ്കെടുക്കുമ്പോള് ചുരുങ്ങിയ സമയനോട്ടീസിനുള്ളില് കര്ഷകരുള്പ്പെടെ ഇതരപ്രതിനിധികള് സ്വന്തം ചെലവില് വിവിധ സംസ്ഥാനങ്ങളില് നിന്ന് ഒരുമണിക്കൂര് യോഗത്തിന് ഡല്ഹിയില് എത്തിച്ചേരേണ്ട പ്രായോഗികത സംഘാടകര് വിസ്മരിച്ചത് കുറ്റകരമായ അനാസ്ഥയും രഹസ്യഅജണ്ടകളുടെ ഭാഗവുമാണ്. കഴിഞ്ഞ ഒരു മാസക്കാലം ഡല്ഹിയിലുണ്ടായിരുന്ന വിവിധ റബറുല്പാദന സംസ്ഥാനങ്ങളിലെ പാര്ലമെന്റംഗങ്ങള് ഈ ഒരുമണിക്കൂര് യോഗത്തിനുമാത്രമായി ഡല്ഹിയിലെത്തിച്ചേരുമെന്നതില് ഉറപ്പില്ല. അനിയന്ത്രിതമായ റബര് ഇറക്കുമതിയിലൂടെ വിലത്തകര്ച്ച നേരിട്ട് റബര് മേഖല വീര്പ്പുമുട്ടുമ്പോള് ഇത്തരം പ്രഹസനങ്ങളിലൂടെ കര്ഷകരുള്പ്പെടുന്ന ജനവിഭാഗത്തെ ആക്ഷേപിക്കുകയാണ് റബര്ബോര്ഡും കേന്ദ്രസര്ക്കാരും ചെയ്യുന്നതെന്ന് വി.സി.സെബാസ്റ്റ്യന് സൂചിപ്പിച്ചു.
കേന്ദ്രസര്ക്കാര് രൂപം നല്കാനുദ്ദേശിക്കുന്ന റബര് നയത്തില് നിലവിലെ പ്രതിസന്ധികള്ക്ക് ഇതിനോടകം പരിഹാരമാര്ഗ്ഗങ്ങള് നിര്ദ്ദേശിക്കപ്പെട്ടിട്ടില്ല. റബറിന് അടിസ്ഥാന ഇറക്കുമതി വില പ്രഖ്യാപിക്കുവാനോ, വിപണിയില് തറവില നിശ്ചയിക്കാമെന്ന റബര് ആക്ട് 13-ാം വകുപ്പിന്റെ അടിസ്ഥാനത്തില് ഇടപെടലുകള് നടത്താനോ തയ്യാറാകാതെ കേന്ദ്ര വാണിജ്യമന്ത്രി നിഷേധനിലപാടാണ് കഴിഞ്ഞ പാര്ലമെന്റ് സമ്മേളനത്തില് സ്വീകരിച്ചത്. വിലസ്ഥിരതാഫണ്ടില് നിന്നുള്ള തുകപോലും ഈ പ്രതിസന്ധിയില് കര്ഷകര്ക്കു നല്കാതെ, അന്താരാഷ്ട്ര കരാറുകളുടെ അടിസ്ഥാനത്തില് പ്രകൃതിദത്ത റബറിന്റെയും റബറുല്പന്നങ്ങളുടെയും നികുതിരഹിത ഇറക്കുമതിക്ക് കേന്ദ്രസര്ക്കാര് അംഗീകാരം നല്കിയിരിക്കുന്നത് വരുംനാളുകളില് റബര് വിപണിയില് വന്വിലത്തകര്ച്ച സൃഷ്ടിക്കുവാന് ഇടയാക്കുമെന്ന് വി.സി.സെബാസ്റ്റ്യന് പറഞ്ഞു.
ഫാ.ആന്റണി കൊഴുവനാല്
ജനറല് സെക്രട്ടറി, ഇന്ഫാം