10:13 am 15/3/2017
ലഖ്നോ: കൂട്ടമാനഭംഗ കേസിൽ പ്രതിയായ യു.പി മുൻ മന്ത്രിയും സമാജ്വാദി പാർട്ടി നേതാവുമായ ഗായത്രി പ്രജാപതി ലഖ്നോവിൽ അറസ്റ്റിൽ. ഗായത്രി പ്രജാപതിക്ക് പുറമേ മറ്റ് ആറ് പേർ കൂടി കേസിൽ പ്രതികളാണ്. ഇതിൽ രണ്ട് പേരെ യമുന എക്സ്പ്രസ് ഹൈവേക്ക് സമീപത്ത് നിന്ന് മാർച്ച് 7ന് പൊലീസ് പിടികൂടിയിരുന്നു. കേസുമായി ബന്ധപ്പെട്ട് പ്രജാപതിയുടെ സുരക്ഷ ഉദ്യോഗസ്ഥരിലൊരാളെ മാർച്ച് ആറാം തിയതി പൊലീസ് അറസ്റ്റ് ചെയ്തിരുന്നു.
യുവതിയെ പീഡിപ്പിക്കുകയും അവരുടെ മകളെ ആക്രമിക്കുകയും ചെയ്തതിനാണ് പ്രജാപതിക്കും മറ്റ് ആറ് പേർക്കുമെതിരെ പൊലീസ് കേസെടുത്തത്. ഇക്കഴിഞ്ഞ ഉത്തർപ്രദേശ് തെരഞ്ഞെടുപ്പിലും പ്രജാപതി മൽസരിച്ചിരുന്നു. എന്നാൽ ബി.ജെ.പി സ്ഥാനാർഥിയോട് പരാജയപ്പെടുകയായിരുന്നു.