11:18 am 4/5/2017
തിരുവനന്തപുരം: കോട്ടയം ജില്ലാ പഞ്ചായത്ത് പ്രസിഡന്‍റ് തെരഞ്ഞെടുപ്പിൽ കേരള കോൺഗ്രസ് എമ്മിന്‍റെ നീക്കം നിർഭാഗ്യകരമായി പോയെന്ന് പാർട്ടി വർക്കിങ് ചെയർമാൻ പി.ജെ. ജോസഫ്. പുതിയ രാഷ്ട്രീയ നീക്കത്തെക്കുറിച്ച് കെ.എം. മാണിയുമായി ചർച്ച ചെയ്യുമെന്നും പി.ജെ. ജോസഫ് വ്യക്തമാക്കി.
സി.പി.എമ്മിന്‍റെ പിന്തുണ തേടുന്ന കാര്യത്തെക്കുറിച്ച് പാർട്ടിയിൽ ചർച്ച ചെയ്തിട്ടില്ല. എൽ.ഡി.എഫിൽ ചേരുന്ന കാര്യവും പാർട്ടി ചർച്ച ചെയ്തിട്ടില്ല. പ്രാദേശിക തലത്തിൽ യു.ഡി.എഫുമായി യോജിച്ച് പോകാനായിരുന്നു ചരൽക്കുന്ന് ക്യാമ്പിലെ തീരുമാനമെന്നും അദ്ദേഹം മാധ്യമപ്രവർത്തകരോട് പറഞ്ഞു.
ജില്ലാ പഞ്ചായത്ത് പ്രസിഡന്‍റ് തിരഞ്ഞെടുപ്പിൽ സി.പി.എം പിന്തുണ തേടിയതിനെച്ചൊല്ലി കേരള കോൺഗ്രസിൽ ഭിന്നത ഉടലെടുത്തിരുന്നു. പുതിയ കൂട്ടുകെട്ടുമായി മുന്നോട്ടു പോകാനുള്ള മാണിയുടെ തീരുമാനത്തിന് പി.ജെ. ജോസഫിന്‍റെ പിന്തുണയില്ല. അതേ സമയം, നിലവിലെ സംഭവവികാസങ്ങൾ കേരളാ കോൺഗ്രസിലുണ്ടാക്കിയ അസ്വസ്ഥതകളെ പരമാവധി പ്രയോജനപ്പെടുത്താനുള്ള നീക്കത്തിലാണ് കോൺഗ്രസ്.