10.08 AM 28-07-2016
കൊച്ചി: കൊച്ചി മെട്രോയുടെ നിര്‍മാണ പുരോഗതി വിലയിരുത്തുന്നതിനായി കൊച്ചി മെട്രോ പദ്ധതിക്ക് വായ്പ നല്‍കുന്ന ഫ്രഞ്ച് ഏജന്‍സിയായ ഫ്രാന്‍സെ ഡി ഡെവലപിന്റെ (എ.എഫ്.ഡി) പ്രതിനിധികള്‍ കൊച്ചിയിലെത്തി. സന്ദര്‍ശനത്തിന്റെ ആദ്യ ദിവസമായ വ്യാഴാഴ്ച്ച ആദ്യ ഘട്ട മെട്രോ നിര്‍മാണം നടക്കുന്ന സ്ഥലവും രണ്ടാം ഘട്ടത്തിലെ നിര്‍ദ്ദിശ്ട സ്ഥലങ്ങളും സന്ദര്‍ശിച്ചു. രാവിലെ നിര്‍മാണം അതിവേഗം പുരോഗമിക്കുന്ന കളമശേരി സ്റ്റേഷനില്‍ നിന്നാണ് സംഘം സന്ദര്‍ശനം തുടങ്ങിയത്.
ഇടപ്പള്ളി ടി.എ കോറിഡോര്‍ സന്ദര്‍ശിച്ച ശേഷമായിരുന്നു ഇന്‍ഫോപാര്‍ക്ക് വരെയുള്ള രണ്ടാം ഘട്ട മെട്രോ കടന്നു പോവുന്ന സ്ഥലങ്ങളുടെ സന്ദര്‍ശനം. വൈകിട്ട് വൈറ്റില മൊബിലിറ്റി ഹബ്ബും പനമ്പിള്ളി നഗറില്‍ പുതുതായി നിര്‍മിച്ച വാക്ക്‌വേയും സന്ദര്‍ശിച്ചായിരുന്നു ആദ്യ ദിന പര്യടനം അവസാനിപ്പിച്ചത്. എ.എഫ്.ഡി അര്‍ബന്‍ ട്രാന്‍സ്‌പോര്‍ട്ട് എക്‌സ്‌പേര്‍ട്ട്് പ്രിസില്‍ ഡി കോണിക്ക്, റിജിയണല്‍ ഓഫീസ് ഡയറക്ടര്‍ നികോളാസ് ഫോര്‍ണജെ, ജ്യോഗ്രാഫിക്കല്‍ കോര്‍ഡിനേറ്റര്‍ ഓഫ് ഏഷ്യ ഡിപ്പാര്‍ട്ട്‌മെന്റ് മര്യന്‍ കാര്‍ച്ചര്‍, പ്രോജക്ട് കോഡിനേറ്റര്‍ ജൂലിയറ്റ് ലീ പനീറെര്‍ എന്നിവരാണ് സംഘത്തിലുള്ളത്. മെട്രോയുടെ രണ്ടാം ഘട്ട പദ്ധതിയെ കുറിച്ചും വായ്പയുടെ രണ്ടാം ഗഡുവിനെ കുറിച്ചുള്ള വിശദാംശങ്ങളും കൊച്ചി മെട്രോ റെയില്‍ ലിമിറ്റഡ് മാനേജിങ് ഡയറക്ടര്‍ ഏലിയാസ് ജോര്‍ജ്ജുമായി ഇന്ന് സംഘം ചര്‍ച്ച ചെയ്യും. വൈറ്റില മൊബിലിറ്റി ഹബ്ബ്, 100 കോടിയുടെ നഗരവികസന പദ്ധതികള്‍ എന്നിവ ചര്‍ച്ചയില്‍ വിഷയമാകും.
