01:20pm 4/5/2016
ന്യൂഡല്‍ഹി: ഭീകര സംഘടനയായ ജെയ്ഷെ മുഹമ്മദിലെ 12 പ്രവര്‍ത്തകരെ സ്ഫോടക വസ്തു ശേഖരവുമായി ഡല്‍ഹി പോലീസ് സ്പെഷ്യല്‍ സെല്‍ പിടികൂടി. ഡല്‍ഹി, ഉത്തര്‍പ്രദേശ് എന്നിവിടങ്ങളില്‍ ഏതാനും ദിവസങ്ങളിലായി നടന്നുവരുന്ന റെയ്ഡിനെ തുടര്‍ന്നാണ് നടപടി.
ഡല്‍ഹിയിലെ ഇന്ദര്‍പുരി, ഭജന്‍പുര, ചാന്ദ്ബാഗ് എന്നിവിടങ്ങളില്‍ നിന്ന് എട്ടു പേരെയാണ് പിടികൂടിയത്. യു.പിയിലെ ദിയോബന്ദില്‍ നിന്ന് നാലു പേരും പിടിയിലായി. ഇവരില്‍ നിന്ന് സ്ഫോടകവസ്തുക്കളും പിടിച്ചെടുത്തു. ഇവരെ സ്പെഷ്യല്‍ സെല്‍ ലോധി കോളനിയിലെ ഓഫീസില്‍ എത്തിച്ച് ചോദ്യം ചെയ്യുകയാണ്. പശ്ചിമ ഉത്തര്‍പ്രദേശില്‍ റെയ്ഡ് തുടരുകയാണെന്നും പോലീസ് അറിയിച്ചു.
പിടിയിലായവരില്‍ രണ്ടു പേര്‍ മഹസീര്‍, തഹീര്‍ എന്നിവരാണെന്ന് പോലീസ് തിരിച്ചറിഞ്ഞിട്ടുണ്ട്. ജനുവരിയില്‍ നടന്ന പത്താന്‍കോട്ട് ആക്രമണത്തിന്റെ മാതൃകയില്‍ ഡല്‍ഹിയില്‍ വന്‍ ഭീകരാക്രമണത്തിന് സാധ്യതയുണ്ടെന്ന് പോലീസിന് ലഭിച്ച രഹസ്യ വിവരത്തെ തുടര്‍ന്നാണ് റെയ്ഡ് നടത്തിയത്.