09:34 am 23/8/2016
ഡിട്രോയിറ്റ്: ഓഗസ്റ്റ് 13-ാം തീയതി ശനിയാഴ്ച വൈകുന്നേരം ഇടവക വികാരി ബഹു. രാമച്ചനാട്ട് ഫിലിപ്പച്ചന്‍ തിരുനാള്‍ കൊടിയേറ്റ് കര്‍മ്മം നിര്‍വ്വഹിച്ചു. തുടര്‍ന്ന് വേലിയാത്ത് ജേക്കബ് ചാണ്ടിയും ചിന്നമ്മയും സംഭാവനയായി നിര്‍മ്മിച്ചു നല്‍കിയ ഗൂഡല്ലൂപ്പേ മാതാവിന്റെ ഗ്രോട്ടോ വെഞ്ചരിച്ചു. ഗ്രോട്ടോയുടെ നിര്‍മ്മാണപ്രവര്‍ത്തനങ്ങള്‍ക്ക് നേതൃത്വം നല്‍കിയത് റ്റോബി മണിമലേത്തും സംഘവുമാണ്. ഡിട്രോയിറ്റ് സെന്റ് തോമസ് സീറോ മലബാര്‍ കത്തോലിക്കാ ഇടവക വികാരി ബഹു. മൂലേച്ചാലില്‍ റോയിയച്ചന്‍ ലദീഞ്ഞും, ആഘോഷമായ പാട്ടുകുര്‍ബാന ബഹു. രാമച്ചനാട്ട് ഫിലിപ്പച്ചനും, വചന സന്ദേശം റോക്ക്‌ലാന്റ് വെസ്റ്റ് ചെസ്റ്റര്‍ ബ്രോങ്ക്‌സ് കണക്ടിക്കട്ട് ക്‌നാനായ കത്തോലിക്ക മിഷന്‍ ഡയറക്ടര്‍ ബഹു. ആദോപ്പള്ളില്‍ ജോസച്ചനും നല്‍കി. ലൈവ് ഓര്‍ക്കസ്ട്രയോടുകൂടി മാക്‌സിന്‍ ഇടത്തിപ്പറമ്പിലിന്റെ നേതൃത്വത്തില്‍ സെന്റ് മേരീസ് ക്വയര്‍ ഡിട്രോയിറ്റ് നടത്തിയ ഗാനമേള ഏറെ ശ്രദ്ധ നേടി. സ്‌നേഹവിരുന്നു മുമ്പാകെ പ്രസുദേന്തിമാരെ പ്രതിനിധാനംചെയ്തു ശ്രീ. മാത്യൂസ് ചെരുവില്‍ ഏവര്‍ക്കും നന്ദി പറഞ്ഞു.
ഓഗസ്റ്റ് 14-ന് ഞായറാഴ്ച തിരുനാള്‍ ദിനത്തിലെ പ്രധാന കാര്‍മ്മികനായ ബഹു. ആദോപ്പള്ളില്‍ ജോസച്ചന്‍ സ്ലോസേ പാടി പരി. മാതാവിന്റെ തിരുസ്വരൂപം ധൂപിക്കുകയും ആഘോഷമായ തിരുനാള്‍ പാട്ടുകുര്‍ബാനയും അര്‍പ്പിച്ചു. PIMF(Pontifical Institute for Foriegn Mission) റീജിയണല്‍ സുപ്പീരിയര്‍ ബഹു. പള്ളിപ്പറമ്പില്‍ ജോര്‍ജച്ചന്‍ ലദീഞ്ഞ് നടത്തുകയും, വചന സന്ദേശം ഫാ. ജോസഫ് പുളിന്താനവും (മാനന്തവാടി രൂപത) നല്‍കി.
ഡിട്രോയിറ്റ് സെന്റ് ജോസഫ് സീറോ മലങ്കര കത്തോലിക്ക ഇടവക വികാരി ബഹു. പത്രോസച്ചന് തിരുനാള്‍ പ്രദക്ഷിണം നയിച്ചു. തുടര്‍ന്ന് പരി. കുര്‍ബാനയുടെ ആശീര്‍വാദം ബഹു. ചക്കിയാന്‍ ജോയിയച്ചനും നല്‍കി. ജോസ് ലൂക്കോസ് പള്ളിക്കിഴക്കേതിലിന്റെയും വിനോദ് കോണ്ടൂര്‍ ഡേവിഡിന്റെയും നേതൃത്വത്തില്‍ സെന്റ്. മേരീസ് ചെണ്ടമേളം ടീം പ്രദക്ഷിണത്തിനു മേളക്കൊഴുപ്പേകി. പ്രസുദേന്തിമാരായ രാജു&സിമി തൈമാലിലും, മാത്യൂസ് & മേഴ്‌സി ചെരുവിലും, ജോസ് & ഓമന ചാരംകണ്ടത്തിലും പാരിഷ് കൗണ്‍ സിലിനൊപ്പം തിരുനാള്‍ ഭംഗിയോടും ഭക്തിയോടും കൂടി നടത്താന്‍ നേതൃത്വം നല്‍കി.
ജെയിസ് കണ്ണച്ചാന്‍പറമ്പില്‍ അറിയിച്ചതാണിത്.