– ജോയി കുറ്റിയാനി
മയാമി: ജന്മനാടിന്റെ ഓര്‍മ്മകള്‍ മനസ്സില്‍ സൂക്ഷിക്കുന്ന പ്രവാസി മലയാളികള്‍ക്ക് വിസ്മയം വിരിയിച്ചുകൊണ്ട് കേരള സമാജം ഓഫ് സൗത്ത് ഫ്‌ളോറിഡ അമേരിക്കന്‍ മലയാളികള്‍ക്കായി കാഴ്ചവയ്ക്കുന്ന “പതിനൊന്നാമത് സൗത്ത് ഫ്‌ളോറിഡ നെഹ്‌റു ട്രോഫി വള്ളംകളി’ മത്സരത്തിന് ആരവമുണരാന്‍ ഇനി ദിവസങ്ങള്‍ മാത്രം.
ഒക്ടോബര്‍ ഒന്നാം തീയതി ശനിയാഴ്ച രാവിലെ പത്ത് മണിക്ക് ഫോര്‍ട്ട് ലൗഡര്‍ ഡേയിലെ ഹോളിവുഡ് നഗരത്തിലെ റ്റി.വൈ. പാര്‍ക്കിലെ 85 ഏക്കറോളം വരുന്ന വിശാലമായ തടാകത്തിലെ കുഞ്ഞോളങ്ങളെ കീറിമുറിച്ച് ശരവേഗത്തില്‍ ആവേശതിരയിളക്കി ‘സൗത്ത് ഫ്‌ളോറിഡ നെഹ്‌റു ട്രോഫിയില്‍’ മുത്തമിടുവാന്‍ 8 ടീമുകള്‍ കച്ചമുറുക്കി ഈ ജലമാമാങ്കത്തിനെത്തുന്നു.
കേരളത്തിലെ പ്രസിദ്ധമായ ചുണ്ടന്‍, ചുരുളന്‍ വള്ളങ്ങളില്‍ തുഴ എറിഞ്ഞ് അമരം പിടിച്ച അനേകം വിദഗ്ദ്ധര്‍ വീറും വാശിയുമേറിയ ഈ ജലമാമാങ്കത്തിനെത്തുന്നു. ന്യൂയോര്‍ക്ക് മുതല്‍ മയാമി വരെയുള്ള വള്ളംകളി പ്രേമികള്‍ ഒരുമിച്ചു കൂടുമ്പോള്‍ ഈ മത്സരത്തിന്റെ ആവേശം വാനംമുട്ടെ ഉയരുമെന്ന് കേരളസമാജം പ്രസിഡന്റ് ജോസ്‌മോന്‍ കരേടന്‍ പറഞ്ഞു.
രാധാകൃഷ്ണന്‍ കുഞ്ഞുപിള്ള ക്യാപ്റ്റനായ ഭാരത് ബോട്ട് ക്ലബ്ബ്, ന്യൂയോര്‍ക്ക്; സിബിള്‍ ഫെലിക്‌സ് ക്യാപ്റ്റനായുള്ള എം.എ.സി.എഫ്. താമ്പചുണ്ടന്‍; ജോര്‍ജ്ജ് സെബാസ്റ്റിയന്‍ ക്യാപ്റ്റനായ കേരള ഡ്രാഗന്‍സ്; ബിഷിന്‍ ജോസഫ് ക്യാപ്റ്റനായുള്ള മാറ്റ് (MAT) റ്റാമ്പാ; ജോബി എബ്രാഹം ക്യാപ്റ്റനായുള്ള ഡ്രം ലൗവേഴ്‌സ്; ഗുഡ് വിന്‍ പോറത്തൂര്‍ ക്യാപ്റ്റനായുള്ള മയാമി ചുണ്ടന്‍; ജുബിന്‍ കുളങ്ങര ക്യാപ്റ്റനായുള്ള ക്‌നാനായ ചുണ്ടന്‍; പ്രഭാകര്‍ രാമലിംഗം ക്യാപ്റ്റനായുള്ള സൗത്ത് ഫ്‌ളോറിഡ തമിഴ്‌സംഘം എന്നീ പുരുഷ ടീമുകള്‍ക്കു പുറമെ താമ്പ വനിത ടീമും മയാമി വനിത ടീമും ഈ മത്സരത്തില്‍ മാറ്റുരയ്ക്കും.
ഈ മത്സരത്തിന്റെ ഒന്നാം സമ്മാനം 2500 ഡോളറും, എവര്‍ റോളിംങ്ങ് ട്രോഫി: നെഹ്‌റു ട്രോഫിയും; രണ്ടാം സമ്മാനം ആയിരത്തിയൊന്ന് ഡോളറും ട്രോഫിയുമാണ് നല്‍കുന്നത്.
അര കിലോമീറ്റര്‍ ദൂരം വരുന്ന രണ്ടു ട്രാക്കിലൂടെയാണ് മത്സരം നടത്തുന്നത്. സമയം മാനദണ്ഡമാക്കിയാണ് ഹീറ്റ്‌സ് മത്സരം നടത്തുന്നതെങ്കില്‍ സെമിഫൈനലും, ഫൈനല്‍ മത്സരങ്ങളും, ഫോട്ടോ ഫിനിഷിംഗിലൂടെയാണ് വിജയികളെ കണ്ടെത്തുന്നത്. അമേരിക്കന്‍ പാഡിലേഴ്‌സ് അസോസിയേഷന്റെ അമ്പയര്‍മാരാണ് ഈ മത്സരം നിയന്ത്രിക്കുന്നത്.
ഡ്രോണ്‍ ക്യാമറ സംവിധാനം വഴി സ്റ്റാര്‍ട്ടിംഗ് പോയിന്റു മുതല്‍ ഫിനിഷിംഗ് പോയിന്റു വരെയുള്ള മത്സരങ്ങള്‍ വലിയ ടി.വി. സ്ക്രീനില്‍ കാണത്തക്കവിധത്തില്‍ ഈ വര്‍ഷം ക്രമീകരിച്ചിട്ടുണ്ടെന്ന് വള്ളംകളി മത്സരകമ്മിറ്റി ചെയര്‍മാന്‍ പീറ്റോ സെബാസ്റ്റിയനും, കമ്മിറ്റി അംഗങ്ങളായ റോബിന്‍സ് ജോസ്; പത്മകുമാര്‍ കെ.ജി, സുധീഷ് പി.കെ. തുടങ്ങിയവര്‍ അറിയിച്ചു.
വള്ളംകളി മത്സരത്തിനു ശേഷം റ്റി.വൈ.പാര്‍ക്കില്‍ പ്രത്യേകം തയ്യാറാക്കിയ വേദിയില്‍ അത്യന്തം വാശിയേറിയ പ്രൊഫഷ്ണല്‍ വടംവലി മത്സരം നടത്തപ്പെടും. ഹൂസ്റ്റണ്‍, ഷിക്കാഗോ, താമ്പ, മയാമി, ഫോര്‍ട്ട് ലൗഡര്‍ ഡെയില്‍ തുടങ്ങിയ ആറു ടീമുകള്‍ ഈ മത്സരത്തില്‍ ഏറ്റുമുട്ടും.
ഒന്നാം സമ്മാനം രണ്ടായിരത്തിയൊന്ന് ഡോളറും, രണ്ടാം സമ്മാനം എഴുന്നൂറ്റി അമ്പത് ഡോളറുമാണ് വിജയികള്‍ക്ക് നല്‍കുന്നത്.
കേരളസമാജത്തിന്റെ ഈ ജലമാമാങ്കത്തോടനുബന്ധിച്ച്, കേരള സാംസ്കാര തനിമ വിളിച്ചോതുന്ന വാദ്യമേളാഘോഷങ്ങളുടെ അകമ്പടിയോടെയുള്ള സാംസ്കാരിക ഘോഷയാത്ര, കുട്ടികള്‍ക്കും, യുവജനങ്ങള്‍ക്കും വിനോദമത്സരങ്ങളും, കപ്പ മുതല്‍ ബാര്‍ബിക്കു ഫിഷ് വരെയുള്ള വിവിധ ഫുഡ് സ്റ്റാളുകളും തട്ടുകടയും ഒരുക്കിയിട്ടുണ്ടെന്ന് കേരളസമാജം സെക്രട്ടറി നോയല്‍ മാത്യു അറിയിച്ചു.
ഈ പതിനൊന്നാമത് ജലമേളയുടെ ഒരുക്കങ്ങള്‍ക്കായി കേരള സമാജം കമ്മിറ്റിയും, വിവിധ സബ് കമ്മിറ്റികളും അവിരാമം പ്രവര്‍ത്തിക്കുന്നു. അതുകൊണ്ട് മലയാളികള്‍ നെഞ്ചിലേറ്റിയ ഈ ജലമാമാങ്കത്തിലേയ്ക്ക് മലയാളികള്‍ മാത്രമല്ല ഇന്ത്യന്‍അമേരിക്കന്‍ കമ്മ്യൂണിറ്റിയില്‍ നിന്നും വലിയൊരു ജനാവലിയെ റ്റി.വൈ പാര്‍ക്കിലേക്ക് പ്രതീക്ഷിക്കുന്നു.