12:30 pm 24/11/2016
ബന്ഡ: പരീക്ഷ ഫീസടക്കാനുളള പണം ബാങ്കില് നിന്ന് പിന്വലിക്കാന് സാധിക്കാത്തതിനെ തുടര്ന്ന് കോളേജ് വിദ്യാര്ത്ഥി ആത്മഹത്യ ചെയ്തു. ഉത്തര്പ്രദേശിലെ ബാന്ഡയിലുള്ള മാവി ബുസുര്ഗ് ഗ്രാമത്തിലാണ് സംഭവം. പാഞ്ചനി ഡിഗ്രി കോളേജിലെ ബിഎസ്സി രണ്ടാം വര്ഷ വിദ്യാര്ഥി സുരേഷ് (18) ആണ് അമ്മയുടെ സാരി ഉപയോഗിച്ച് വീട്ടില് തൂങ്ങി മരിച്ചത്.
കഴിഞ്ഞ ഏതാനും ദിവസങ്ങളായി സുരേഷ് പണം പിന്വലിക്കാനായി ബാങ്കിലെ ക്യൂവില് നിന്നിരുന്നു. ഫീസടക്കാനുള്ള പണം പിന്വലിക്കുന്നതിനായിരുന്നു ഇത്. എന്നാല് ഇയാള്ക്ക് പണം പിന്വലിക്കാന് സാധിച്ചിരുന്നില്ല. ബുധനാഴ്ചയായിരുന്നു കോളേജില് ഫീസടക്കേണ്ടിയിരുന്ന അവസാന തീയതി.
ചൊവ്വാഴ്ചയും സുരേഷ് ബാങ്കില് ക്യൂ നിന്നിരുന്നു. എന്നാല് അപ്പോഴും പണം ലഭിച്ചില്ല. ചൊവ്വാഴ്ച ബാങ്കില് നിന്നു മടങ്ങിയെത്തിയതിനു ശേഷം യുവാവ് ആത്മഹത്യ ചെയ്യുകയായിരുന്നുവെന്ന് ബന്ധുക്കള് പറഞ്ഞു. ഫീസടക്കാന് കഴിയാത്ത മനോവിഷമത്തില് സുരേഷ് ആത്മഹത്യ ചെയ്യുകയായിരുന്നു എന്നാണ് ബന്ധുക്കള് ആരോപിക്കുന്നത്.
സംഭവത്തില് പൊലീസ് കേസെടുത്ത് അന്വേഷണം ആരംഭിച്ചു. യുവാവിന്റെ ആത്മഹത്യകുറിപ്പ് കണ്ടെത്തിയതിനു പിന്നാലെ ഗ്രാമവാസികള് ബാങ്ക് ആക്രമിച്ചു. ബാങ്കിനു നേരെ രൂക്ഷമായ കല്ലേറ് നടന്നതായാണ് റിപ്പോര്ട്ടുകള്.