11:29am 23/3/2016
ബ്രസല്‍സ്: ബെല്‍ജിയം തലസ്ഥാനമായ ബ്രസല്‍സില്‍ ചാവേര്‍ സ്‌ഫോടനം നടത്തിയ ഭീകരരെന്ന് സംശയിക്കുന്നവരുടെ ചിത്രം പുറത്തുവിട്ടു. ഇരട്ട സ്‌ഫോടനം നടന്ന സാവെന്റം വിമാനത്താവളത്തിലെ സി.സിടിവി ദൃശ്യങ്ങളില്‍ പതിഞ്ഞ ചിത്രങ്ങളാണ് ബെല്‍ജിയം പൊലീസ് പുറത്തുവിട്ടത്. ചാവേറാക്രമണം നടത്തിയ മൂന്നുപേര്‍ ട്രോളികള്‍ തള്ളിക്കൊണ്ടു പോകുന്നതാണ് ചിത്രത്തിലുള്ളത്.
ഇതില്‍ രണ്ടു പേര്‍ ചാവേറായി പൊട്ടിത്തെറിച്ചെന്നാണ് ബെല്‍ജിയം പൊലീസ് കരുതുന്നത്. മൂന്നാമനാണ് ചിത്രത്തില്‍ കാണുന്ന ഇളം നിറത്തിലുള്ള ജാക്കറ്റും തൊപ്പിയും ധരിച്ച ആള്‍. ഇയാള്‍ക്കായി പരിശോധന ഊര്‍ജിതമാക്കിയതായി ഫെഡറിക് പ്രോസിക്യൂട്ടര്‍ വാന്‍ ലീവ് അറിയിച്ചു.
രണ്ട് സ്‌ഫോടനങ്ങളാണ് സാവെന്റം വിമാനത്താവളത്തില്‍ നടന്നത്. എന്നാല്‍, ടെര്‍മിനലില്‍ നടത്തിയ വിശദമായ പരിശോധനയില്‍ പൊട്ടാത്ത ഒരു ബെല്‍റ്റ് ബോംബ് പൊലീസ് കണ്ടെടുത്തു.