06:37 pm 8/10/2016
മലയാളത്തിന്‍റെ യുവ സൂപ്പര്‍സ്റ്റാര്‍ പൃഥ്വിരാജ് സംവിധായകനാകുന്നു എന്നത് വലിയ വാര്‍ത്തയായിരുന്നു. മെഗാതാരം മോഹന്‍ലാലാണ് നായകനായ ലൂസിഫര്‍ ആണ് പൃഥ്വിയുടെ ആദ്യചിത്രമാകുക. മുരളി ഗോപിയാണ് സിനിമയുടെ തിരക്കഥ എഴുതുന്നത്. എന്നാല്‍ ചിത്രത്തിന്‍റെ പ്രഖ്യാപനത്തിന് അപ്പുറം പൃഥ്വി ചിത്രത്തെക്കുറിച്ച് വലിയ പ്രതികരണങ്ങള്‍ ഒന്നും നടത്തിയിട്ടില്ല. എന്നാല്‍ ലൂസിഫറിന്‍റെ എന്ന് പറഞ്ഞ് പ്രചരിക്കുന്ന ഫസ്റ്റ്ലുക്കുകള്‍ക്ക് എതിരെ പൃഥ്വിരംഗത്ത് വന്നു.
പൃഥ്വിയുടെ ഫേസ്ബുക്ക് പോസ്റ്റ് ഇങ്ങനെ,
നമസ്കാരം, ഈ പോസ്റ്റ്, ‘ലൂസിഫർ’ എന്ന എന്റെ ആദ്യത്തെ സംവിധാന സംരംഭത്തെ കുറിച്ചാണ്. ആദ്യം തന്നെ ഒരായിരം നന്ദി! ഇതിനോടകം എനിക്ക് ലഭിച്ച സ്നേഹത്തിനും ഇങ്ങനെ ഒരു തീരുമാനത്തിന് നൽകിയ പ്രോഹത്സാഹനത്തിനും. നിങ്ങളുടെ ആവേശം തന്നെ ആണ് ഈ സിനിമയുടെ ഏറ്റവും വലിയ ശക്തി! എന്നാൽ… ‘ലൂസിഫർ’ എന്ന സിനിമയുടെ ഇന്നേ വരെ ഇറങ്ങിയ “ഫസ്റ്റ് ലുക്കുകളും”, “ട്രെയിലറുകളും”, “മോഷൻ പോസ്റ്ററുകളും” ഒന്നും തന്നെ ആ സിനിമയുടെ യഥാർത്ഥ കഥയെയോ കഥാപാത്രത്തെയോ ആസ്പദം ആക്കി ഉള്ളതല്ല. അവ എല്ലാം തികച്ചും അണ്ണോഫിഷ്യൽ ആയ ആരാധക സൃഷ്ടികളാണ്. നിരുത്സാഹപ്പെടുത്തുക അല്ല..അവയിൽ പലതും കലാബോധവും മൂല്യവും ഉള്ളവയാണ്..പക്ഷെ എന്റെ സിനിമയുമായി ഒരു തരത്തിലും ബന്ധമുള്ളതല്ല എന്ന് മാത്രം! ‘ലൂസിഫർ’ ന്റെ പ്രാരംഭ ഘട്ട ചർച്ചകളിൽ ആണ് നമ്മൾ ഇപ്പോൾ. ഇനിയും ഒരുപാട് സഞ്ചരിക്കേണ്ടിയിരിക്കുന്നു ലാലേട്ടൻ എന്ന സൂപ്പർ സ്റ്റാറും മഹാനടനും അരങ്ങു വാഴുന്ന ആ സിനിമയുടെ സാക്ഷാത്കാരത്തിലേക്കു എത്താൻ. ഈ യാത്രയിൽ എന്നോടൊപ്പം നിങ്ങളും ഉണ്ടാവും എന്ന പ്രതീക്ഷയിൽ,
-പ്രിത്വി!