06:29 pm 12/5/2017
മുംബൈ: പോർച്ചുഗീസ് സൂപ്പർ താരം ക്രിസ്റ്റ്യാനോ റൊണാൾഡോ ഇന്ത്യയിലേക്ക്. ഇന്ത്യ ആതിഥ്യം വഹിക്കുന്ന അണ്ടർ 17 ലോകകപ്പിന്റെ ഭാഗമായാണ് റൊണാൾഡോയുടെ ഇന്ത്യാ സന്ദർശനമെന്നാണു സൂചന. അണ്ടർ 17 ലോകകപ്പിന്റെ മത്സര ഷെഡ്യൂളുകളുടെ നറുക്കെടുപ്പ് റൊണാൾഡോ നടത്തുമെന്നും ഓൾ ഇന്ത്യൻ ഫുട്ബോൾ ഫെഡറേഷനുമായി ബന്ധപ്പെട്ട വൃത്തങ്ങൾ സൂചന നൽകി.
മുംബൈയിലാണ് ഫുട്ബോൾ ലോകകപ്പിനുളള മത്സര ഷെഡ്യൂളുകൾ തീരുമാനിക്കുന്നത്. റയൽ മാഡ്രിഡ് താരമായ റൊണാൾഡോയുടെ സൗകര്യം കൂടി പരിഗണിച്ചാകും ഇക്കാര്യത്തിൽ അന്തിമ തിയതി പ്രഖ്യാപിക്കുക. റൊണാൾഡോയുടെ സമയം ലഭിക്കുന്നതിനായി അദ്ദേഹത്തിന്റെ ഏജന്റുമായി ഫുട്ബോൾ ഫെഡറേഷൻ ചർച്ച നടത്തിയെന്നും റിപ്പോർട്ടുകളുണ്ട്.
ഒക്ടോബർ ആറ് മുതലാണ് ഇന്ത്യയിൽ ഫിഫ അണ്ടർ 17 ലോകകപ്പ് ആരംഭിക്കുക. കൊച്ചിയടക്കം ഇന്ത്യയിലെ ആറ് വേദികളിലായാണ് മത്സരം. കോൽക്കത്തയിലാണ് കലാശപ്പോര് നടക്കുന്നത്.