04:44 pm 9/10/2016
ന്യൂഡൽഹി: ഡൽഹി ഇന്ദിരാഗാന്ധി രാജ്യാന്തര വിമാനത്താവളത്തിെൻറ കാർഗോ ടെർമിനലിൽ റേഡിയോ ആക്ടീവ് ചോർച്ചയുണ്ടായതായി റിപ്പോർട്ട്. കാര്‍ഗോയില്‍ നിന്ന് ആണവ കിരണങ്ങള്‍ ചോരുന്നതായി ആറ്റമിക് എനർജി റഗുലേറ്ററി ബോർഡ് ഉദ്യോഗസ്ഥർ അറിയിച്ചതായാണ് വിവരം. ചോർന്നിരിക്കുന്ന ആണവ കിരണം തന്നെയാണോയെന്ന് പരിശോധനക്ക് ശേഷം മാത്രമേ സ്ഥിരീകരിക്കാൻ കഴിയൂയെന്നും ഉദ്യോഗസ്ഥർ വ്യക്തമാക്കി
ടി ത്രീ കാര്‍ഗോ ടെര്‍മിനലില്‍ നിന്നാണ് ചോർച്ചയെന്നാണ് അഗ്നിശമന വിഭാഗത്തിന് ലഭിച്ച വിവരം. എയർഫ്രാൻസ് വിമാനത്തിൽ കൊണ്ടുവന്ന ആശുപത്രി ഉപകരണത്തിൽ നിന്നാവാം ചോർച്ചയെന്നാണു പ്രാഥമിക നിഗമനം. സംഭവത്തെ തുടർന്ന് ടെർമിനലിൽനിന്ന് ആളുകളെ ഒഴിപ്പിച്ചു.
ദേശീയ ദുരന്ത നിവാരണ സേനയും ആറ്റമിക് എനർജി റഗുലേറ്ററി ബോർഡ് ഉദ്യോഗസ്ഥരും സ്ഥലത്തുണ്ട്. സ്ഥിതി നിയന്ത്രണാധീനമാണെന്ന് അധികൃതർ അറിയിച്ചു.