മരണത്തെ മുഖാമുഖം കണ്ട ആശുപത്രിക്കാലത്തിനു ശേഷം ജീവിതത്തിന്റെ കളത്തിലേക്ക് മാന്ത്രികനെപ്പോലെ തിരികെയെത്തിയ ഫുട്ബോള് ഇതിഹാസം പെലെ മൂന്നാമതും വിവാഹിതനായി. കാമുകി മാര്സിയ സിബേലെ അയോകിയെയാണ് പെലെ ജീവിത സഖിയാക്കിയത്. ആറു വര്ഷത്തെ പ്രണയത്തിനു ശേഷമാണ് ഇരുവരും വിവാഹിതരാകുന്നത്.
ഔദ്യോഗികമായി ഇവര് നേരത്തെ വിവാഹിതരായിരുന്നു. എന്നാല് വ്യാഴാഴ്ചയാണ് ഇരുവരുടെയും വിവാഹ ചടങ്ങുകള് നടന്നത്. സംപൗളോയിലെ ഗോരുജയിലായിരുന്നു വിവാഹ ചടങ്ങുകള്. പെലെയുടെ ആരോഗ്യകാരണങ്ങളാലാണ് വിവാഹം നീണ്ടുപോയത്. 75 കാരനായ ഫുട്ബോള് മാന്ത്രികന് തന്നേക്കാള് 25 വയസിന് ഇളപ്പമുള്ള കൂട്ടുകാരിയെയാണ് തന്റെ നല്ലപാതിയാക്കിയിരിക്കുന്നത്.ജപ്പാന് സ്വദേശിനിയാണ് മാര്സിയ.
റോസിമെരി ചോല്ബിയാണ് പെലെയുടെ ആദ്യ ഭാര്യ. 12 പ്രണയ വര്ഷം നീണ്ട ബന്ധത്തില് അദ്ദേഹത്തിന് മൂന്ന് കുട്ടികളുണ്ട്. രണ്ടാം വിവാഹം ഗോസ്പല് ഗായിക അസീരിയ നാസിമെന്റോയുമായാണ്. 14 പ്രണയവര്ഷമായിരുന്നു ഈ ദാമ്പത്യത്തിന്റെ ആയുസ്. ഈ ബന്ധത്തില് രണ്ടു മക്കളാണുള്ളത്.