10:00am 21/8/2016
പി.പി. ചെറിയാന്‍
വെസ്റ്റ് ടെക്‌സസ്: പതിനാല് വയസ്സിനു താഴെയുള്ള ബാലികയെ തുടര്‍ച്ചയായി നാലമാസം ലൈംഗീക പീഢനത്തിനിരയാക്കിയ കെല്ലി അലക്‌സാണ്ടര്‍ ലുവിസ് എന്ന പ്രതിയെ 693 വര്‍ഷം ജയിലിലടക്കുവാന്‍ കേസ്സിലെ വാദം കേട്ട ജൂറി വിധിച്ചു.
ആഗസ്റ്റ് 18നാണ് സുപ്രധാന വിധി പ്രഖ്യാപനം ഉണ്ടായതെന്ന് മിഡ്‌ലാന്റ് കൗണ്ടി ഡിസ്ട്രിക്റ്റ് അറ്റോര്‍ണി ഓഫിസില്‍ നിന്നു പുറത്തിറക്കിയ പ്രസ് റീലിസില്‍ പറയുന്നു.
2014 സെപ്റ്റംബര്‍ 1 മുതല്‍ 2014 ഡിസംബര്‍ 23 വരെയുള്ള കാലഘട്ടത്തിലാണ് 14 വയസ്സുള്ള പെണ്‍കുട്ടി പീഡനത്തിനിരയായത്. സ്വന്തം കുടുംബാംഗങ്ങളില്‍ ഒരാളായിരുന്നു ഈ പെണ്‍കുട്ടി. ഏഴു വകുപ്പുകളിലായി ചാര്‍ജ്ജ് ചെയ്യപ്പെട്ട കേസ്സില്‍ ഓരോന്നിലും 99 വര്‍ഷം വീതമാണ് ശിക്ഷിച്ചത്. കൂടാതെ ഓരോന്നിലും 10,000 ഡോളര്‍ പിഴയാക്കുന്നതിനും ഉത്തരവായിട്ടുണ്ട്.
പീഡനകേസ്സില്‍ ഏറ്റവും ഉയര്‍ന്ന ശിക്ഷയാണ് ജൂറി പ്രതിക്ക് നല്‍കിയത്. 599 വര്‍ഷം വരെയാണ് ഇത്തരം കുറ്റകൃത്യങ്ങള്‍ക്ക് ലഭിക്കുന്ന ശിക്ഷ.
അസിസ്റ്റന്റ് ഡിസ്ട്രിക്റ്റ് അറ്റോര്‍ണി ബൈക്ക് പറ്റേഴ്‌സണ്‍, വിറ്റ്‌നി ഗ്രാഫിത്ത്, നോറ നൊഡൊള്‍ഫ് എന്നിവരാണ് കേസ്സ് വിസ്താരത്തിന് ഹാജരായത്.
പ്രതിയുടെ പേരില്‍ ഒരു കേസ്സു മാത്രമാണുള്ളതെങ്കിലും യാതൊരു പരിഗണനയും നല്‍കുവാന്‍ ജൂറി തയ്യാറായില്ല. പ്രായപൂര്‍ത്തിയാകാത്ത പെണ്‍കുട്ടികളെ ലൈംഗികമായി പീഡിപ്പിക്കുന്നത് മാപ്പര്‍ഹിക്കാത്ത ശിക്ഷയാണെന്ന് ഇവര്‍ ചൂണ്ടികാട്ടി.