07:10pm 29/4/2016
താന്‍ സിനിമയില്‍ അഭിനയിക്കുന്നുവെന്ന വാര്‍ത്ത നിഷേധിച്ച് നടി കല്‍പ്പനയുടെ മകള്‍ ശ്രീമയി. ഇപ്പോള്‍ ഞാന്‍ പ്ലസ് വണ്ണിന് പഠിക്കുകയാണ്. പഠനത്തിന് ശേഷം സിനിമ അഭിനയവുമായി ബന്ധപ്പെട്ട കോഴ്‌സ് പഠിക്കണം. അതിന് ശേഷമേ സിനിമാ അഭിനയത്തെക്കുറിച്ച് ചിന്തിക്കുന്നുള്ളുവെന്നും ശ്രീമയി പറഞ്ഞു. അഭിനയിക്കാന്‍ താല്‍പ്പര്യമുണ്ടെങ്കിലും ഇപ്പോള്‍ പഠനത്തിനാണ് മുന്‍ഗണന നല്‍കുന്നതെന്നും ശ്രീമയി കൂട്ടിച്ചേര്‍ത്തു.
ഇപ്പോള്‍ ഒരു സിനിമയിലേക്കും തനിക്ക് ഓഫര്‍ ലഭിച്ചിട്ടില്ലെന്നും ശ്രീമയി പറഞ്ഞു. പ്രൊഫഷനായി എടുക്കാന്‍ പറ്റിയ മേഖലയാണ് സിനിമയെന്ന് അമ്മ പറഞ്ഞിട്ടുണ്ട്. വളര്‍ന്നത് ചെന്നൈയിലായത് കൊണ്ട് തമിഴ് സിനിമയില്‍ അഭിനയിക്കാനാണ് താല്‍പ്പര്യം. കോമഡി വഴങ്ങുമോ എന്നറിയില്ലെന്നും ശ്രീമയി പറഞ്ഞു.
സിനിമയില്‍ അഭിനയിക്കാനുള്ള താല്‍പ്പര്യം ഉര്‍വശിയുടെ സാന്നിധ്യത്തില്‍ ശ്രീമയി പ്രഭുദേവയോട് പറഞ്ഞതായി വാര്‍ത്തകളുണ്ടായിരുന്നു. ഈ വാര്‍ത്തയുടെ അടിസ്ഥാനത്തില്‍ ശ്രീമയി സിനിമയിലേക്ക് വരാന്‍ തയ്യാറെടുക്കുന്നതായി റിപ്പോര്‍ട്ടുകളുണ്ടായിരുന്നു.
