04:10pm 29/6/2016 ന്യൂഡല്‍ഹി: ബന്ധപ്പെട്ട മന്ത്രിമാരുടെ അനുമതിയുണെ്ടങ്കില്‍ ഐഎഎസ്-ഐപിഎസ്, ഐഎഫ്എസ് ഉദ്യോഗസ്ഥര്‍ക്കു തുടര്‍ച്ചയായി ഏഴു വര്‍ഷം വിദേശത്തു ജോലി ചെയ്യാന്‍ അനുമതി. ഇപ്പോള്‍ അഞ്ചു വര്‍ഷത്തേക്കാണ് അനുമതിയുള്ളത്. വിവിധ മന്ത്രിമാരുടെ അഭ്യര്‍ഥനയെത്തുടര്‍ന്നാണു പഴ്‌സണല്‍ ആന്‍ഡ് ട്രെയിനിംഗ് വകുപ്പിന്റെ തീരുമാനം. ഐഎഎസ്, ഐപിഎസ്, ഇന്ത്യന്‍ ഫോറസ്റ്റ് സര്‍വീസസ് വിഭാഗങ്ങള്‍ക്കു മാത്രമാണ് കാലപരിധിയില്‍ ഇളവ്.

03:49pm 29/6/2016 ന്യൂഡല്‍ഹി: ഡല്‍ഹിയില്‍ 17 വയസുകാരി കൂട്ടമാനഭംഗത്തിനിരയായി. ജഗത്പൂരിയിലെ ഒരു സ്വകാര്യ സ്‌കുളില്‍വച്ചാണ് സംഭവം. സുഹൃത്തും സ്‌കൂള്‍ സുരക്ഷാ ജീവനക്കാരനും ചേര്‍ന്നാണ് പെണ്‍കുട്ടിയെ മാനഭംഗപ്പെടുത്തിയത്. ജോലി വാഗ്ദാനം നല്‍കി സുഹൃത്താണ് തന്നെ സ്‌കൂളിലേക്കു കൊണ്ടുവന്നത്. ഇവിടെ എത്തിയശേഷം ഓഫീസില്‍വച്ച് സുഹൃത്തും സുരക്ഷാ ജീവനക്കാരനും തന്നെ പീഡിപ്പിക്കുകയായിരുന്നുവെന്ന് പെണ്‍കുട്ടി പോലീസിനു മൊഴി നല്‍കി. സംഭവത്തില്‍ പ്രതികളായ രണ്ടു പേരെയും പോലീസ് പിടികൂടിയിട്ടുണ്ട്.

13:01 PM 29/06/2016 മുംബൈ: ഇസ്താംബുൾ വിമാനത്താവളത്തിലുണ്ടായ ചാവേർ ആക്രമണത്തിൽ നിന്നും ബോളിവുഡ് നടൻ ഹൃതിക് റോഷനും മക്കളും രക്ഷപ്പെട്ടത് തലനാരിഴക്ക്. ആക്രമണത്തിന് ഏതാനും മണിക്കൂർ മുമ്പ് ഹൃതിക്കും മക്കളായ റിഹാനും റിഥാനും വിമാനത്താവളത്തിലുണ്ടായിരുന്നു. വൈകിയെത്തിയതിനാൽ പോകേണ്ടിയിരുന്ന വിമാനത്തിൽ ഹൃതികിന് ബിസിനസ് ക്ലാസ് ടിക്കറ്റ് ലഭിച്ചില്ല. എന്നാൽ വിമാനത്താവളത്തിലെ ജീവനക്കാർ മറ്റൊരു വിമാനത്തിൽ ടിക്കറ്റ് ശരിയാക്കിക്കൊടുത്തു. ഹൃതിക്കും മക്കളും വിമാനത്താവളം വിട്ട് ഏതാനും മണിക്കൂറുകൾ പിന്നിട്ടപ്പോഴാണ് ചാവേറാക്രമണം ഉണ്ടായത്.